مفتتح …
…………..
طار الحمام
يا نخل يا مخبِّي السنين فوق السنين
طار الحمام
زي الغياب بيكُر م الأشواق حنين
جُوَّا الشُّنط طعم السفر
في القلب رعشة ونبض بيعافر
والغُربة لمبة بيت يتيم
بتهرَّب الحكايات.. مع عيون المسافر
يا حمام..
الموت ناموس بيوِش
بس الفوانيس ع المراكب شعرها بيهِش
رفرف وطير
يا كتير على جفون الشجر يا ليل
لسَّه الحجر بيوشوش النور بالدفا
لسَّه الحمام طاير على بالي
كلمة بحبَّك وطن
بس الفراق..
هو اللي قالها لي..
…………..
القصيدة ..
…………..
“الدنيا ابسط من كده”
لو عين بتحزن
أو عين بتبكي
أو عين بتتعب م الالم
فيه عين بتسند تاني عين
يا شِفِّتين يا مضمومين حاضنين لبعض
فيه في اختلافكوا فجأة ضحكة ويا بعض
فاتطمنوا..
الدنيا ابسط من كدة
مهما الحياة كانت حقيقة وانبهار
في الحلم حاجة واقعة منك في النهار
فاحلم وعيش..
الدنيا ابسط من كدة
يا ورد طالع للسما من وسط طين
فيه جدود كتير
نازلين عشان تطلع لفوق
ومعاك يشوفوا الدنيا من نظرة حنين
يا كل حاجة سايبة حاجة عشان مافيش حاجة ببالين
الدنيا ابسط من كدة
ياليل ياليل
شِبَّاكي حادف ل الليالي دبلتين
والشمس بِتْفَتَّح عينيا..
لقيت في خدي دمعتين
قلت ماشي
واخدت دُش وقهوتي وقُمت ماشي
عصافير كتير عاملين مظاهرة على الشجر
قالوا طريقك من هنا لأ من هنا لأ من هنا
وانا.. قلت ماشي
صممت سكة لإبتسامتي وقمت ماشي
الدنيا ابسط من كدة
انا كنت شاعر بالملل
شغلت راديو العمر علق ع الامل
قالوا الحروب والطيارات والموت شديد
وانا قلت بكرة نرد حق الانسانية..
بجيل جديد
قالوا احنا لينا اية هناك؟!
قلت الحروب جت عندنا
قالوا احنا لينا اية هنا؟
غير المكانة والغِنى؟
غير الغلابة، والدفاع عن حقهم..
لما البِدَل تاكل لحالها وبس ماتبصش لنا
دة احنا القليل.. لكننا..
ادوارنا اكبر.. في الحياة من كل دة
وانا قلت دوري بنخوتي، ومحبتي للخلق ..
ابسط من كدة
قالوا السواقة،
والسواقين مابينزلوش من عالكراسي
وانا قلت ليهم انهاردة اليوم بيضحك.. بكرة قاسي
قالوا الامل كداب
حقيقة
علشان بتزرع فيه بشكك مش بفاسي
الدنيا ابسط من كدة
***
اقرأ المزيد:
- قصيدة بالعامية المصرية.. اسأل عنيها.. للشاعر: محمد الصياد
- اصلي ازاي.. قصيدة بالعامية المصرية.. للشاعر: مصطفي يوسف
- شايٌ بالياسمين.. شعر: فوزية شاهين
ظهرت المقالة الدنيا ابسط من كده.. قصيدة بالعامية المصرية للشاعر محمود حامد أولاً على أحداث العرب.
