لولا رحمة ربنا.. مكانش هيحوم في السما
ولا يرفُص الريح بجناحته
ولا حتى كان هيطير!
وانا مش بغير لو شوفته طاير من هناك
وانا وحدي بحزن من هنا!
يمكن عشان انا مؤمنة
ان اللي زرع البذرة دي فـ قلبي الجميل
هو اللي عارف كيف هيرويها
واني بمشيئته ورحمته.. بكبر.. وأشِب
مش شطارة..
وعشان كدا..
معرفش اقول ع الفترة دي
كلمة” خسارة”.
انا والقصيدة… زي طيرَة وقمح!
خطين في قلب الصفحة جم بالطول
لكن في طرف الصفحة جُم بالعرض
واللي يرزق في السما
رزاق في آخر أرض!
مش فرض يعني اني اقتحم كل الشاشات
وانزل يوماتي
وأسابق الاوقات
واكسب حاجات
واخسر حاجات
واختار اصاحب كل عين بتبات
ترصد حروف الشُعرا ع الشاشة اللعينة
الغيبة وحشة
بس برضو ساعات..
بتطل ليا بفكرة بنت لذينة
لكن..
بختار اشارك صمتي أفكاري!
واقفل عينيا على اللي فات بهدوء
واربط على الفكرة في حشايا 100 حجر
يمكن تصبر قلبي ع الجوع المهين
واقصد مهين..
مش فقر
ولا ذل
لكن..لو زقزق الطير جوا راسي
ومطالش قمحُه تكون.. اهانة
واسأل عليا في كل اركان البلد
والتكعيبات
هيقولو ليك ان النايات.. بتبات تنادي الطير
وينام في كفي ويصحى يتهادى بغنايا
فـ ازاي هنام والشعر مش بايت معايا!
لكن عزايا..
انها دنيا.. ودنيئة
وان اللي حط الشعر في كفوفي العذارىٰ؛
وحنّاني بيه
قادر يحنن قلبي برضو عليه
ويرزقني قُوْتي..
لكن إلى أن.. يجي الميعاد
هفضل ببص على اللي فات بهدوء
وأفضل بشارك كل تفكيري اللي جاي
لـ المحنة
والطير
ولـ سكوتي.
…………………
#نورا_عايد.
اقرأ المزيد:
قصيدة بالعامية المصرية.. اسأل عنيها.. للشاعر: محمد الصياد
من بره.. قصيدة بالعامية المصرية.. للشاعر: مينا ليشع
الحزن الجاي.. قصيدة بالعامية المصرية للشاعر: سمير فرج
الدنيا ابسط من كده.. قصيدة بالعامية المصرية للشاعر محمود حامد
ظهرت المقالة الطير.. قصيدة بالعامية للشاعرة: نورا عايد أولاً على أحداث العرب.
