خيال الظل.. قصيدة بالعامية المصرية للشاعر:محمد ناجى الابطاوى

لما دخلت الجيش ماحاربتش حد
حتى خيال الضل ف ميدان ضرب النار
اخدت ف ذات النفس قرار
اني مأصوبش عليه
مع انى نشانجى وممكن اصيبه ف نن عنيه
يمكن لانه صديقى من وأنا لسه صغير
كان اخوه واقف حارس غيط البطيخ
م الديب اللى بينزل من تل الفراعين
ويفرقع ف البطيخ
طخ طاخ طيخ
طول الليل
خيال الحقل لابس برنيطة وشوال
ومتذنب ليل ونهار ف الغيط
الشمس اتناشر ساعة عليه
وف نص الشهر العربى
قمرنا رسم له ع الارض خيال
والديب متأكد انه زى المرسوم ع الارض خيال
الديب بيفقش ف البطيخ
والبطيخ بيفرقع ..كأنه عيار
طخ طاخ طاخ طيخ
وأنا من وضع ثبات ف ميدان ضرب النار
اخدت قرار
مش هضرب في خيال الضل ولا اصيبه بطلقة
الصول سن بيادتة الناشفة
ف كعب بيادتى يرن
ويقولي اضرب
طيب اضرب ليه ؟
خيال الضل ده غلبان
زى اخوه اللى انا شفته زمان ف غيط البطيخ
اللى ماخوفش الديب
خيال الضل حبيب
طيخ طيخ
طيخ طيخ
كل الزملاء بتنشن وبتضرب وتصيب
وانا مطروح ع الارض
وواخد وضع ثبات للضرب
الصول.
شد الاجزاء
سن الدبانه اسفل الهدف
اضرب
غمضت عنيه ونفذت الامر
خيال الضل نام ع الارض
وارتاح من الوقفه تحت لهيب الحر
خيال الضل
أنا آسف
جدا آسف
غصب عنى كنت بانفذ امر.
******
نص تاني ..
مين قال البحر بيضحك ؟!!!
……………..
البحر حزين
والقلل الشرقانه
غرقانه ف وحل وطين
والبنت اللى بتغسل مواعينها على المورده
عرَّت رجليها لحد الفخدين
عورتها مابقتش تهم
راح فين الدم .
البحر مكشر مابيضحكش
زعلان
البحر مشتاق للفيضان
بس إزاى هيفيض .
البحر مولع
والميه ما تطفى حريق
البحر ياناس عطشان
والميه مابترويش
البحر مابيخبيش
زعلان من كتر القهر
مابيضحكش لحد .
والمركب أبو قلع كبير
لم القلع .
وشاحط ف الجسر
مستنى الريح
والريح مستني المد
فى عرض البحر
وماجاش المد
مد يا مراكبى ايديك مد وشد
ولا الحيل اتهد
مين هيعوم مركب
فى الطين
وإن كنت فطين
هتعرف إن المفتاح
قدس فلسطين
وإحنا زى البنت اللى هناك ع النيل
البنت اللى معريه وراكها
وتحت بطاطها
ومابقتش تخاف من حد
وهى بتغسل مواعينها هناك
ع المورده وتعدد
تحدي .. وإحنا نردد
وعنيها بتزرف دمع
وتقول :
البحر بيعيَّط ليه
وأنا نازله لتحت
لتحت. (ناى حزين)
لتحت
لتحت
تحت
تحت
تحت
أملى القلل .
(عطشان ياصبايا دلونى ع السبيل )
عطشان والميه جاريه
وإيديا مكتفين
وياسين غرقان فى دمه
خاف منه الباش حكيم
احكم بالعدل ياقاضى قدامك مظاليم
والبحر حزين
البحر حزين

شعر: محمد ناجى الابطاوى

اقرأ المزيد:

الصمت في حرم الجمال.. قصيدة بالعامية المصرية للشاعرة رضا عبد الوهاب

الفائزون فى مسابقة قصص هالة فهمى و أشعار محمد عبد القوى حس

ملتقي شعراء الجامعات بمعرض الكتاب ابو جليل يصعد بشباب الشعراء

ظهرت المقالة خيال الظل.. قصيدة بالعامية المصرية للشاعر:محمد ناجى الابطاوى أولاً على أحداث العرب.