الشاعر المصري عبد المنعم الحريري احد شعراء العامية المصرية الكبار ونختار لقراء “أحداث العرب” هذا النص الرائع من نصوصه ونقدمه للساة ضمن مبادرة كل يوم شاعر، ونتمني له المزيد من التألق في مجال شعر العامية المصرية.
والان مع القصيدة:
منحاز للناس
اللي على الهامش عايشين
اللى بيسموهم ..
فقرا وغلابه ومساكين
اللى متعلقه أرواحهم
بالزرع والنيل والطين ..
وصورهم على حيطة قديمة
بتنطق ..جوه البرواز….
…………
الناس السهله..
اللى الدنيا فى عنيهم دايما
مش مستاهله..
ضحكوا على الدنيا ولا يوم غرتهم
وإن رسم الشقا ..تجاعيد غرتهم
هتلاقى الضحكة فى عيونهم
الله يعينهم ..
إن مر الفرح عليهم ..
بيكون أصلا إعجاز ….
………
الناس اللي الدنيا عليهم رايحه وجايه
مش خايفين ماللحظة الجايه
شايفين بكره بعيون حانيه
وقلوبهم مكشوفه وباينه..
عايشنها أشكال والوان ..
حقيقة و مجاز..وقصايد حيه ..
صور ومعانى
كاتبين للصبر مواويل وأغانى
الحزن ..سايبينه هناك على شط بعيد
مقضينها ..على. الشط التانى ……
أنا ..كلت معاهم عالطلبية
عيش بالملح
انا دوقت معاهم طعم الرضا والفرح
وفهمت السر
اللى بيداوى وبيطبطب عالجرح
ياما صليت وياهم على شط الترعه
فى صلاة العصر
فى مصلية جدرانها من الطين والحنه
فوقنا صفصافة عليها عصافير الجنه
واقفين على أرض نجيل
ونجيل الأرض منبت
من يوم ما جدودى صلوا ورا سيدنا (الخضر )
وخيوط النور الطالعه من هنا للشمس
كل الأشياء حواليك بتسبح..
وبتهمس همس …
المعنى الكامل للدهشة والصورة البكر
النبع الأبدى للراحة ..وصفاء الفكر
الجذر الأول لجمال الدنيا ..والمعنى ..والأوصاف
ياما لفيت الدنيا ..
على سرير القش الطواف
متعلق فوق ضهر الساقية
ما بين ( الهوديه ) وبين ( الناف)
كان صوت جدى بيصلب ضهرى
ويقولى ..إوعا تخاف…
وكبرت…
وقابلت الناس ..أشكال وأصناف
ولا مرة نسيت أيامهم
وانا كلى حنين لكلامهم
فى لسانى طعم زمانهم ..
كان اجمل شئ فى الدنيا ..
كان طعم العيش الحاف………….
عبد المنعم الحريرى
شرح مفصل لمعاني بعض الكلمات الغامضة في القصيدة:
*( الهوديه) ..جزع شجرة مثبت فى الساقية ..تحديدا فى عمود التروس التى تحرك الساقية ..
*( الناف ) ..عرق خشب طويل متحرك يثبت طرفه على رقبة الحيوان الذى يحرك الساقية ..والطرف الآخر يثبت مع الطرف العلوى للهوديه..يتشكل حرف V ..حيث نقوم بتثبيت سرير القش ..نستلقى عليه ..يدور مع دوران الساقية.
اقرأ المزيد:
طوابير بتنزف ناس.. قصيدة بالعامية المصرية للشاعر : أحمد شرقاوي البارودي
- قصيدة بالعامية المصرية.. اسأل عنيها.. للشاعر: محمد الصياد
- الطير.. قصيدة بالعامية للشاعرة: نورا عايد
- من بره.. قصيدة بالعامية المصرية.. للشاعر: مينا ليش
- الدنيا ابسط من كده.. قصيدة بالعامية المصرية للشاعر محمود حامد
- الحزن الجاي.. قصيدة بالعامية المصرية للشاعر: سمير فرج
- اصلي ازاي.. قصيدة بالعامية المصرية.. للشاعر: مصطفي يوسف
- قلب مش لايق علي البرواز.. قصيدة بالعامية المصرية.. شعر: رضا عبد النبي
- صوت المصلحة.. قصيدة بالعامية المصرية للشاعر: حلمي قاسم
- كلام فى الفاضى والمليان..شعر: عبد الباري إمام
- صوت المصلحة.. قصيدة بالعامية المصرية للشاعر: حلمي قاسم
- كلام فى الفاضى والمليان..شعر: عبد الباري إمام
- متعشّمين في الفرفشة.. قصيدة بالعامية المصرية للشاعرة: مني رؤوف
ظهرت المقالة سرير القش الطواف.. قصيدة من شعر العامية المصرية.. للشاعر: عبد المنعم الحريري أولاً على أحداث العرب.
