صبَح الصباح والقلب خالي إلّا مِ اللي باريه
والروح بِتِسْبَح في الفضا وهَمَّها ترضيه
والعقل راضي بالقضا مهما هيحصل فيه
من بعد طول الشقا اجعل لي نورك شط
لو يِعلَى موج الليل قلبي اللي تاه يلاقيه
……………
خدني العشم على فوق
بين السحاب فتحت
وقبل حتى ما افوق
شالني ورماني لتحت
…………..
مدّيت عيوني على كف الطريق أقراه
لمحت قلبك في آخره بدر اكتمل في سماه
طَيّرت روحي يمام يلمحني لو جواك
نضرت غيري فيه ولقيتني أنا براه
نَهنِه عليَّ الطريق وقال لي ما معناه:
“الحب من غير أمل يا ولدي ما أقساه!”
………….
ولولا زرعة الطبلة ما طرحت أرضنا غوازي
ولا مهنة التطبيل ما كان يهزمنا يوم غازي
ولا يدهسنا أي نظام ولا تبكي عيون الشام
ولا يبقى ما بينّا خصام في دوحة او في بنغازي
…………
الحزن لو خربشك ما تحولوش بسمة
لأ ضحكة عملاقة
والشوكة لو تنكشك خلّيها بين أياديك
من الورود باقة
وإن جت نيران العداوة وقصدها تلطشك
حوّلها لصداقة
بين كل شيء نرفضه وكل شيء نهواه
فيه رابطة و علاقة
وبيقبل التحويل من صورة للتانية
بقانون بقاء طاقة
………….
وجهتُ وجهي للذي سوّى
من ضلع آدم أمنا حوّا
ورميت حمولي عَ اللي منه العُون
اللي نصر موسى وغرّق الفرعون
ودعيته يجعل تسبيحُه مَيّة وقُوت
دا انا روحي يونس جوّا بطن الحوت
ورفعت يَدّي أشكي إليه وأبوح
يِخْرِجني من دنيتي على سفينة نوح
…………
مسجون في ضلمة
والحارس بَلا مسعور
ومين للضِيقة غير “واسع”
ومين للضلمة غير “النور”
“ضاقت ولما استحكمت حلقاتها” اضطريت
وسجدت ليك وبكيت وبكايا يملا بحور
ارزقني “كن” رحمتك يزرع فؤادي يقين
اطرحني فيه يقطين وان أرضه كانت بور
…………..
دقّيت بيبان الصبر ما فتحشي
دا عدل منك ياصبر ولّا قسوة وجور
قال لا كل من طال الفرس فارس
ولا كل من قال يا صبر يبقى صبور
يا صبر يا قافل بيبانك ف وشي افتح
فتّش جيوبك ودوّر لي على مطرح
وأنا عند وعدي ليك عمري ما هاخلِف يوم
وهرضى بالمقسوم ومش هاطلب أعيش و افرح
…………..
أنا العبد اللي لو يتباع
في سوق الخلق ما اسواشي
ولو قايضوه بكيلة قمح
للدنيا ما ترضاشي
ولو كل البيبان فضلت
تسد ودانها من خبطي
على باب الكريم واقف
ومش ماشي .
…………..
#نوال حسن
اقرأ المزيد:
-
- قصيدة بالعامية المصرية.. اسأل عنيها.. للشاعر: محمد الصياد
- الطير.. قصيدة بالعامية للشاعرة: نورا عايد
- من بره.. قصيدة بالعامية المصرية.. للشاعر: مينا ليش
- الدنيا ابسط من كده.. قصيدة بالعامية المصرية للشاعر محمود حامد
- الحزن الجاي.. قصيدة بالعامية المصرية للشاعر: سمير فرج
- اصلي ازاي.. قصيدة بالعامية المصرية.. للشاعر: مصطفي يوسف
- قلب مش لايق علي البرواز.. قصيدة بالعامية المصرية.. شعر: رضا عبد النبي
- صوت المصلحة.. قصيدة بالعامية المصرية للشاعر: حلمي قاسم
ظهرت المقالة صبَح الصباح والقلب خالي.. قصيدة شعر للشاعرة: نوال حسن أولاً على أحداث العرب.
