طوابير بتنزف ناس.. قصيدة بالعامية المصرية للشاعر : أحمد شرقاوي البارودي

admin 1 week ago South Tv Comments Off on طوابير بتنزف ناس.. قصيدة بالعامية المصرية للشاعر : أحمد شرقاوي البارودي 0 Views

قصائد من شعر العامية المصرية ننشرها يوميا على صفحات صحيفتكم الغراء “أحداث العرب” لتقديم الشعراء المتميزين الى الساحة، وليتعرفوا على تجارب هؤلاء الشعراء الابداعية من الشعر العامي المصري والذي يعتمد على اللهجة المصرية والمفردات المتداولة في حياتنا اليومية، ليعبر هذا الشعر عن المجتمع المصر وقضاياه المحتلفة من خلال مبادرة كل يوم شاعر والتي يتبناها الشاعر المصري القدير “حمدي حسين”.

مع القصيدة:

سؤال جوايا من بدرى محيرنى
على فين الطريق ماشى
وانا ماشي ومش عارف
وعامل فيها قال عارف
ويمكن أو يجوز جداً
أكون باعرف
وأحلف إنى مش باعرف
ولا هاعرف
ولا ناوى أكون عارف
…….
ب اتوه والسكه واخدانى في دوامه على الآخر
مين اللي هامشى وراه ؟
تايه في صح وغلط
محتار في لأه واه
وتنهيده وقولة آاه
ودوشه وزحمه والسكه بتخنقنى
ولو تضحك
تكون ضحكه بدون معنى
الخوف على بكره
هوه اللى جامعنا
والأسئله صعبه
والإمتحان شغال
وف مهرجان المسأله
كترت عروض الأسئله
تسأل سؤال
يترد لك ٣٠ سؤال
هيه الحقيقه فين ؟
تاهت في سكة مين ؟
أسمع كلام الشمال
واللا كلام اليمين ؟
واللا أتوه في النص
والعن أبو اللى يقول على اللى اتقال
أما الختام
تطلع نتيجة كنترول المشكله
كلام موزون
يطمن قلبى ويفرح عن الأحوال
أقول هيلا يا ناس هبه
هنطلع من سنين عدت وكات صعبه
وعشنا فيها ١٠٠ توهه
و١٠٠ خنقه
وجوانا ٢٠٠ غربه
هتتحول لذكرى نحكى لولادنا
عن العيشه وأيامنا وأحلامنا
ومشوارنا اللى كان غيرنا
ميحملشى يومين منه
يجينا القرش لو ميه
بيتبخر ٢٠٠ منه
وادينا خلاص عدينا لبر أمان
وكل اللى حكيت عنه
صبح ذكرى كأنه ما كان
وانا دلوقتى عالآخر أنا مبسوط
أنا فرحان
أدينا خلاص قربنا
أدينا خلاص قربنا
أدينا خلاااااص قربنا
وفجأه لقيت تنين جنبى
وبيقولوا جدع سرحان
ما تمشى يا عم وتصحصح
أدينا خلاص قربنا
أدينا خلاص قربنا
وفوقت ساعتها
وانا لسه في طابور العيش
وفاضل لى على الشباك يادوب نفرين
ومديت إيدى للبياع وقلتله
عشر ترغف بنص جنيه
قاللى خلاص شطبنا .