الدنيا على وسعها ما تزيد شى على كفّى
كفّى اللى من زرعها بتكفّى وتوفّى
وتلم ليل الشتا فى قلبها المخفى
لو نخفى نَصَب الأَسَى . عَصَب النَسا يشتد
ونهز بالمكنسه كل اللى مالهوش جد
كل اللى عدّى السد من باب بلا حراس
يا معدّى بحر الرّيح إياّك تعيش غطّاس
كون راس لو الموج عَلا
ساعة الغَلا كون ماس
فى الرسم كون منقله
فى الصمت كون أجراس
فتح زهور الأمل فى صبحنا المنفى
يا خشب كلامنا الهش نارك ما بتدفّى
سيب فرعك اللولبى وادخل قلم صفّى
صفّى عصير البكا وارجعلى متشفّى
مين شار عليك تكتحل بالمرود المنشار ؟!
مين دار عليك لبّسك قفطانه بالمندار ؟!
خيطك عيدان القصب صار مسبحة صبار
صبار انا وحالف يا عينى ما ترفّي
رفك مالوش أجنحه ولا هزته تطفّى
شجر الزتون مسكين. من عطشه شرب الضل !
وف زحمة السكاكين ساوى الدخيل بالخل !
يا عمدة الدوّار اسمع معايا الحل :
حل العقود ترتاح .. تطلع لسفح التّل
شخبط حروف امضتك ترتد لك راسك
تلقى سيوف ومضتك شقت عيون ناسك
اصدح بليس , ولم , ولا , ولن وانفى
أما ان بقيت إمعه ودخلت يوم أنفى
حاقفل بيبان الرئه ولا ادوقشى انفاسك
ون صرت صلب الشجر …حابقى فاسك
لَمْلِم حُروف خطبتك وارميها فى القفّه
واكسر دفوف غنوتك بلا مغنى بلا زفّه
كام مره نعمل فرح ، والشمع يتطفّى ؟!
تطفيه رياح النتن فى ليل بلا كبريت
وف مجلس “الهلافيت” مأذوننا يتوفّى
امتى بقى يا “عفريت ” تبعد عن الدفة ؟
ونصلّح الموازين ….. وتكون لنا كفه
لو نحكى عمرين نوح .قولنا
ما هيكفّى
والدنيا على وسعها ما تزيد شى على كفى .
شعر:
عبد الباري إمام
اقرأ المزيد
- قصيدة بالعامية المصرية.. اسأل عنيها.. للشاعر: محمد الصياد
- صوت المصلحة.. قصيدة بالعامية المصرية للشاعر: حلمي قاسم
- متعشّمين في الفرفشة.. قصيدة بالعامية المصرية للشاعرة: مني رؤوف
ظهرت المقالة كلام فى الفاضى والمليان..شعر: عبد الباري إمام أولاً على أحداث العرب.
