زى اللي سابوا ..
………………….
بين الصورة وخلفيتها خلط كبير
بين كلماته وهو فايتها وبين دمعتها
فرق كبير
في النهاية المفردات غير الصور
والعدم كينونة تانية
صوت أجش
حش روحها من سديم الأمنيات
” لما النسيم بيعدي بين شعرك حبيبتي
باسمعه بيقول آهات”
بيقول: منير
بتقول معاه …….
حسيت كأن الكون بخير
وكأن صوتها اللي اتفطم ع الصمت مطلوق الجناح
وكأن خوفها اللي ملازمها فجأة راح
تقسيم بدائي
بين خيالها الحر و ردودة السخيفة
في النهاية المفردات دايمًا مخيفة
أزمة التيه و الجموح
مجروحة تعشق في الحياة مدبوح
مجروحة ترفض تأويلات الليل و آخره في الحكاية
مدبوح ضحية أزمته لحد النهاية
ملزوم يسدد دينه و يدادي البشر
عفاريت بتتنطط قصادهم في انتظار التبريرات
” يادنيا ما بدالك ماشوفتش غير جمالك”
م البداية الذكريات زي الحُفر
يا خالق الخوف و الضجر
ارحمني من نظرة عينيه لحظة شطط
ارحمني من لمسة ايديه…….
قلبي انفرط
ارحمني من مية لسانه فوق كفوفي
يا خالق الليل و الألم ……
امحيلي خوفي
واجعلني أرحم من عيونها
لما شافت دمعته وسابت إيديه، زى اللي سابوا
و احميني مني
من روحي لما تتوجع من جرح صابُه
دابت جوارحي م الأسى
و ملامحي نشفت شققت من يوم غيابُه
يا خالق الآه والسكوت/ خليني مرة احضنه
واجعلني
نبتة
فوق
تُرابه
اقرأ المزيد:
قلب مش لايق علي البرواز.. قصيدة بالعامية المصرية.. شعر: رضا عبد النبي
قصيدة بالعامية المصرية.. اسأل عنيها.. للشاعر: محمد الصياد
الصمت في حرم الجمال.. قصيدة بالعامية المصرية للشاعرة رضا عبد الوهاب
ظهرت المقالة زى اللي سابوا ..قصيدة بالعامية المصرية.. شعر: د. رشا الفوال أولاً على أحداث العرب.
