نخلاية البير.. قصيدة من شعر العامية المصرية للشاعر: أحمد عبد الحكم الامين

بيراود شاشة حلمى
مع انه وقت ما مامات
كنت يا دوب خشيت فى الدنيا
جدى اللى عرفته من حكايات الناس
من صورة متعلقة فى البرواز
على حيطة مندرة العيلة
من ريحة بيتنا المبنى
فى الزمن المنسى
من تقاطيع وش أبويا
وتكشيرة عمى
و جبة وقفطان
على شماعة قديمة ف بيتنا
وأكتر ما عرفنى بجدى
كانت نخلاية البير
زى ما كنا نسميها زمان
كان جدى زرعها
ف طرح سنين الفيضان
ولحد الآن
لسه بنفطر ببلحها ف رمضان
بلحتها أجمل بلحة ف كل النخلات
حكايات كنت أتباهى بيها
زى ما كنت أتباهى بجدى
وجدى اللى عرفته من حكايات الناس
كان عمدة أهل بلدنا
جبروته كان فى الحق
قد ما خاف الخالق
عمره ما هاب الخلق
يفصل فى قضايا حدود الأرض
ويزعق صوته فى المعووج
زعقة تخوف أجدعها كبير
وف جنى القطن
أو لمّ السمسم
أو وقت حصاد القمح
تلاقيه متربع وسط الغيط
بيهاتى فى الأنفار
لجل يشدوا الحيل
يباشر كل كبيره وصغيره
ويحوّط فى الزرعايه
بقرايته للقرآن
جدى كان حافظ
ومحافظ ع الفرض
جدى كان عاشق للأرض
يوعى جرنه بنفسه
مع انه العمده
كان ناصب فى الدوار فلكة للحرامية
حتى العفاريت – إتهيأ للناس –
إنها بتخاف من هيبة جدى !!
أنا كنت صغير وقت ما مات
لكن شفته ف وش الناس
وقت ما كانوا بيقروله الفاتحة
شفته ف حسرة وش أبويا
وأنا تايه بين زرعتنا وزرعة جارنا !
شفته ف لمتنا زماااان
شفته ف نخلاية البير
اللى زرعها ف طرح سنين الفيضان
ولحد الآن
لسه بنفطر ببلحها ف رمضان
……………
احمد عبد الحكم

اقرأ المزيد:

• قصيدة بالعامية المصرية.. اسأل عنيها.. للشاعر: محمد الصياد
• الطير.. قصيدة بالعامية للشاعرة: نورا عايد
• من بره.. قصيدة بالعامية المصرية.. للشاعر: مينا ليش
• الدنيا ابسط من كده.. قصيدة بالعامية المصرية للشاعر محمود حامد
• الحزن الجاي.. قصيدة بالعامية المصرية للشاعر: سمير فرج
• اصلي ازاي.. قصيدة بالعامية المصرية.. للشاعر: مصطفي يوسف
• قلب مش لايق علي البرواز.. قصيدة بالعامية المصرية.. شعر: رضا عبد النبي
• صوت المصلحة.. قصيدة بالعامية المصرية للشاعر: حلمي قاسم
• كلام فى الفاضى والمليان..شعر:  عبد الباري إمام
• صوت المصلحة.. قصيدة بالعامية المصرية للشاعر: حلمي قاسم
• كلام فى الفاضى والمليان..شعر:  عبد الباري إمام
• متعشّمين في الفرفشة.. قصيدة بالعامية المصرية للشاعرة: مني رؤوف
• سرير القش الطواف.. قصيدة من شعر العامية المصرية.. للشاعر: عبد المنعم الحريري

ظهرت المقالة نخلاية البير.. قصيدة من شعر العامية المصرية للشاعر: أحمد عبد الحكم الامين أولاً على أحداث العرب.