حدوتة الخشب
البني آدمين.. خشب
خشب.. خشب.. خشب
مسامير في مفصلات
يتهامسوا من سكات
ويعيدوا في اللي فات ..بحضن من لهب
و يدخل الخشب.. جوه الخشب فتكتر..
ذنوب مغيبين
برزخ من ناحيتين
بس الخشب ضعيف.. قدام شهوه وحنين
قدام سوس السنين
ومن صدأ هايحضن.. كل المسامير في يوم
خشب لكنه شايل.. أحمال من الهموم
ومعرض الخشب.. لحاجات سلبيه جدا
لو غضبت الطبيعه..و بلت ليله فيه..
و اتعرض للفساد
أوقات يشيلوا منه ..مسمار و يغيروه
وساعات يجوعوه.. وساعات يشبعوه
وساعات بيشيعوه
يمشي الخشب وراه ..
بيزيق من آلامه ..وخوفه يوم يتوه
ويطلع ليه قتب
خشب ..خشب.. خشب
ضافر زمن نشب ..وكسر فيه بقسوه
فيه منه ب 100 عبايه
ماسك لسه العصايه..فيه منه نون لنسوه
خشب على جسمه كسوه
أوقات فقيره جدا ..أوقات هدوم غنيه
اوقات فالصو و دهب
خشب.. خشب.. خشب
بيموت ولا يلقى ديه
يدبل ورق القضيه
أوقات النمل ياكله
وساعات هو اللي ياكل..
حقوق خشب.. وينهب
ويسرق كل حاجه
حتى يسرق صاموله ..داخل خشب جيرانه
موجود خشب بيلبس..
مسامير نحاس ويضحك ..بحديثهم ع الديون
وفيه خشب ما زال ..
مديون مش لاقي ،،بوهيه،،..
تحميه من كوم صدأ
صدق اللي قال خشب
كل الحياه.. خشب
ماشي يدب دبه.. جوه أرض الخديعه
قاعد يطب طبه..ويا الناس الشنيعه
ويوصل للمجالس..ويوصل للكراسي..
ويغش في الطبيعه
ويصبغ حاجه بيضه
ويشد في حاجه دبلت
خشب ولسه قاعد.. فوق الخشب بفرحه
ماسك في إيده سبحه
في صوته لسه نبحه
لازق في حروفه بحه وبيضحك ع الخلايق
موجود خشب شراقي.. عايش جوه اكتئابه
قافل على نفسه بابه
والثاني لسه قاعد.. فرحان جوه الحدايق
بيدوس كل المبادئ
ويقول ما نيش خشب
أنا أبلكاش خليجي
انا لسه فوق جبيني.. زبيبه حاضنه تاجي
كل الخشب تملي.. والله في احتياجي
علشان هيكل جحطب
خلق الإله خشب
خشب ..خشب.. خشب
لكن مسيره يصبح ..مدفون جوه المغاره
تنزل فوقه الستاره
أو حتى مسيره يصبح.. دايما للكون مناره
أو حتى مسيره يصبح..
مدفون في قصر عاجي
ابراهيم رضوان
اقرأ المزيد:
قصيدة بالعامية المصرية.. اسأل عنيها.. للشاعر: محمد الصياد
ما تشدنيش يادي القمر.. قصيدة بالعامية المصرية.. للشاعرة: مروة فرحات
سرير القش الطواف.. قصيدة من شعر العامية المصرية.. للشاعر: عبد المنعم الحريري
ظهرت المقالة حدوتة الخشب.. قصيدة بالعامية المصرية.. للشاعر: ابراهيم رضوان أولاً على أحداث العرب.
