مساء الخير
وانا معرفشي ليه الصبح حظه أكثر
ودى حاجة تعوز تفسير
تكونش الشمس لها واسطة وعندها فى ديوان الحب… حد كبير
ماهو برضو المسا حقه نحلى له كمان بقه
كده هيغير…ويتمرد. كده القمرة هتتشرد
ومش هتلاقي ليل هتزيل عشوش الهمس والعصافير
مساء الخير
علي كل اللي كانوا الصبح ويايا وحضروا بداية التصوير
مساء الخير
علي كل اللي مشيوا ورايا ومعايا وجابوا السورة والآية وقرأوها برواية حمدى لكن غير
مساء الخير على ابوحجاج وعلي سمعة
وعلي بيجو وابو لمعة وعلي كل اللي حب الشعر عمله ديوان علي أرضية التحرير
مساء الخير
علي اللي بيقرا ويطنش وعلي كل اللي مهتمش
عشان إحساسه مش وياه لأنه فقير
مساء الخير
علي كلمة أمل معنى
علي واحدة مخاصمانى وانا معرفش ليه اشمعنى
لكن يالله تصدقنا بقصيدة شعر تمن البنج والتخدير
مساء الخير
وانا متغمى والفكرة مهيش لاقيه
بالف بروحى في الساقية
مع الحالة اللي بتخليك بدون رؤية
وتبقي حياتك الباقية
مابين انك تقول الحق أو تكدب
أو تنسي عينيك طوعا وتبقي ضرير
مساء الخير
…………
اقرأ المزيد:
-
-
- قصيدة بالعامية المصرية.. اسأل عنيها.. للشاعر: محمد الصياد
- الطير.. قصيدة بالعامية للشاعرة: نورا عايد
- من بره.. قصيدة بالعامية المصرية.. للشاعر: مينا ليش
- الدنيا ابسط من كده.. قصيدة بالعامية المصرية للشاعر محمود حامد
- الحزن الجاي.. قصيدة بالعامية المصرية للشاعر: سمير فرج
- اصلي ازاي.. قصيدة بالعامية المصرية.. للشاعر: مصطفي يوسف
- قلب مش لايق علي البرواز.. قصيدة بالعامية المصرية.. شعر: رضا عبد النبي
-
ظهرت المقالة مساء الخير.. قصيدة بالعامية المصرية للشاعر: حمدي موسي أولاً على أحداث العرب.
