فرفطت روحى ع السكك وجريت
وقطعت كل المناحى بجسدى ماخليت
ورفعت صوتى ف السما و غنيت
كنت بجاهد جهادى ياصاحبى ما كليت
……
ندهت أهل البلد ف الرايحه والجايه
سكنت قلبى الحنون ف العش والغيه
وعينيه راحت تشاشى يابنات الحى
شامه على خد الجميل ف العز انا اتربيت
……..
عيل ومسكون طيابه يابنات الحى
ليه ف الحكايه كلام والله ياخى الخى
ودا خمرة المشتهى دايره من الساقيه
العقل يرمى البعيد ويجيب ف كل شتيت
………
الكلمه عاصيه عليه الليله ياصحابى
رغم إنى كانن وقافل كل أبوابى
بنده حروفى تغنى لكل أحبابى
يجيوا يحطوا ف ضلوعى يشيدولى البيت
……….
وانا اللى جهزت أرضى للغنا ياخال
وجبت قنطار عسل عبيته ف السيال
وركبت أعتى البحور شاطر ولد خيال
لكن جسدى برى ياصاحبى ما اترويت
اقرأ المزيد:
ظهرت المقالة فرفطت روحى ع السكك وجريت.. قصيدة بالعامية للشاعر/ ابراهيم الملاح أولاً على أحداث العرب.
