نَدبَة … قصيدة بالعامية المصرية للشاعر: أحمد مجدي

باقيلي منها قد إيه؟
أنا شوفت أكتر م اللي متعود عليه
المرة ديّا
وشافتني خَلق الله
وقلبي
مصلوب ع الملأ
بينِزّ
دم
وحب
وذكريات
وجَمال
مربوطة إيدي
معصوبة عيني م البصر
م البصيرة
بالنظر
والنظرة اللي بيحبوها
مغصوبة ع الشوف والسكوت
والشُوف في دنيتكم
مشاركة في الخطر
والموت
وانا مش هشيل الذنب
مش قدّه
كفايه ع الواحد وجيعته
وخُذلان الحياة
وتقصير البشر
واللوم على
رفض الخضوع
والذل
وانه يعيشها
ضِل
للخيبة التقيلة
ونُكران الوطن
والغربة
ومشاعره الجميلة
والحزينة
قبل ما يدوسها الوجع
والزمن
وحاجات كتير
تَقلان حسابك في الألم يا أحمد
ومين هيسد
وانت ماعكش إلا ابتسامتك
في البكا
والفرح
والإبتسامة يا حبيبي
في وقتنا
عِلّة
وندبة
فوق كَف القدر
ما يحبهاش تتشاف
واحنا اللي جينا خُفاف
يا ابو الفؤاد شفّاف
غنّي .. غُناك إنصاف
وابكي بُكا الأشراف
لو شافوا فينا ضعاف
ياكلونا ما يخلّوا
لو النصيب شوّاف
ما كانوش هيتخلوا
كل اللي طاطا وخاف
دلوقت مع خِلّه
وانت وانا
أغلب من الصعب اللي عدّى
م الإنتصار في الحرب
والفرح وقت القُرب
والإنهيار في الفراق
والإنهزام في المحاولة
والصمود
وانا قولتلك
وباقول
في كل مرة تثور
وتتمرد أوي
إنك وانا
في عِزّ خُوفك م المواجهة
وتصميمك عليها
بتروح
وترجع
كل مرة
جوا روحك بُقعة أَسوَدْ م اللي فاتها
وتقولي
باقي قد إيه
فيها
ومنها
أنا شوفت أكتر م اللي متعود عليه
المرة ديّا
وشافتني خَلق الله
وقلبي
مصلوب ع الملأ
بينِزّ .. لأخر المعاناة
وانا
هسمع أنينك كل مرة جوا مني
واكتبك جوا القصيدة..
*******
أحمد مجدي

ظهرت المقالة نَدبَة … قصيدة بالعامية المصرية للشاعر: أحمد مجدي أولاً على أحداث العرب.