وكستونا..!! قصيدة بالعامية المصرية للشاعر: نبيل مصيلحي

وكستونا ..!!
—
مانيش عايز ولاحاجه
ولا تكريمكوا ده حاجه
بحتة ورقه يتساوى ..
فيها الأعور مع الشايف
وصاحب العيبه تفرح به
ويقعد ع المنصه خيال
وتهديه الدروع أشكال
وظرف متين وفيه
عشرين
ألوف لحاليح
لأنه وسيم
وطايع للكلام شاطر
وتابع زين
فيكسر عينه لسياده..!!
وتفتح للخيابه بيبان
وللوكسه الأكيده ميدان
وقلت كتير ومين يسمع
يا عالم مين يكرم مين..!!
يا عالم مين يكرم مين..!!
يا عالم مين يكرم مين..!!
مفيش غير حزمة المفاتين
وأمات العقول مجانين
يحطوا الشهره في الفتارين
يا عيني الكعكه ..
ف ايدين اليتيم عجبه
يا عيني العضمه ..
ف ايدين الكلاب قيمه
فعمر الناس ما تتساوى
في أحوال الحياه واحده
خلقها الله على الأضاد
فمنا طويل ومنا قصير
ومنا وزير ومنا غفير
ومنا آرون ومنا فقير
وفينا الشر والطيبه
وفينا الصح والعيبه
وليل ونهار
وشمس وضل
كبير وصغير
ومن كل التضاد دواليك ..
فلا في مشيك تهد الأرض
ولا ف طولك تطولها جبال
فعيشها بحق ربك نور
يهادي الخلق من ضيه
ويزرع م الأماني بدور
–
نبيل مصيلحي
٢٠ من يناير ٢٠٢٥ م

ظهرت المقالة وكستونا..!! قصيدة بالعامية المصرية للشاعر: نبيل مصيلحي أولاً على أحداث العرب.